အာဇာနည်နေ့(Martyrs Day) အကြို စာစီစာကုံးပြိုင်ပွဲ၊ဟောပြောပွဲ၊ကဗျာနှင့်ပန်းချီပြိုင်ပွဲအတွက်မေးထားတာလေး စုဆောင်းထားမိသမျှလေးတွေပါ

📌📌📌အာဇာနည်နေ့(Martyrs Day) အကြို စာစီစာကုံးပြိုင်ပွဲ၊ဟောပြောပွဲ၊ကဗျာနှင့်ပန်းချီပြိုင်ပွဲအတွက်မေးထားတာလေး စုဆောင်းထားမိသမျှလေးတွေပါ❤

#အာဇာနည်နေ့အကြောင်း

==========================

မြန်မာနိုင်ငံတွင် ဇူလိုင်လ ၁၉ ရက်နေ့သည် အာဇာနည်နေ့ဖြစ်သည်။ ၁၉၄၇ ဇူလိုင်လ ၁၉ ရက်နေ့သည် မြန်မာ့လွတ်လပ်ရေးအတွက် ကြိုးစားထမ်းဆောင်ခဲ့သော ဗိုလ်ချုပ်အောင်ဆန်းအပါအဝင် အာဇာနည်ခေါင်းဆောင် (၉) ဦး လုပ်ကြံခံခဲ့ရသော ဝမ်းနည်းဖွယ်နေ့တစ်နေ့ဖြစ်သည်။ ထိုနေ့ကို အာဇာနည်နေ့ဟု သတ်မှတ်ကာ အစိုးရရုံးပိတ်ရက်အဖြစ် သက်မှတ်ပြီး နိုင်ငံတော်အလံကို တိုင်တဝက်လွှင့်ထူခြင်း၊ သံရှည်ဥဩဆွဲခြင်းတို့ဖြင့် ဝမ်းနည်းခြင်း အထိမ်းအမှတ်ကိုပြကြသည်။

အာဇာနည်နေ့သမိုင်းအကျဉ်း

၁၉၄၇၊ မြန်မာစံတော်ချိန် ၁၀နာရီ ၃၇ မိနစ်တွင် ရန်ကုန်မြို့လည်ရှိ အတွင်းဝန်များရုံး၊ ဝန်ကြီးများရုံး၌ အစည်းအဝေးပြုလုပ်နေချိန်ဖြစ်သည်။ ထိုအချိန်တွင် အင်္ဂလိပ်မြို့စောင့်တပ် အမှတ် (၁၂) ၏ စစ်ယူနီဖောင်းအပြည့်အစုံကိုဝတ်ဆင်ကာ စစ်သေနတ်ဖြင့် အစည်းအဝေးပြုလုပ်နေသော ခန်းမထဲသို့ဝင်ရောက် ပစ်ခတ်ခဲ့ကြသည်။ အဆိုပါပစ်ခတ်မှုအား နိုင်ငံတော်လုပ်ကြံမှုအဖြစ် သတ်မှတ်ခဲ့ကာ အတိုက်အခံ နိုင်ငံရေးအင်အားစုတစ်ခုက ကြိုတင်လုပ်ဆောင်ခြင်းဖြစ်ကာ အဓိက ကြိုးကိုင်သူအဖြစ် ဂဠုန်ဦးစောကို စွပ်စွဲခဲ့သည်။ ထို့နောက် ဦးစောနှင့် အပေါင်းအပါတစ်သိုက်အား တရားသူကြီးသုံးဦးပါဝင်သော ခုံရုံးဖွဲ့ စစ်ဆေးရာ ပြစ်မှုထင်ရှားသဖြင့် ၁၉၄၇၊ ဒီဇင်ဘာလ (၃၀) ရက်နေ့တွင် သေဒဏ်ချမှတ်ခဲ့သည်။

ထိုစီရင်ချက်ကို တရားလွှတ်တော်ချုပ်သို့အယူခံဝင်ခဲံရာ ထိုအယူခံလွှာကို ၁၉၄၈ ဧပြီလ ၂၇ ရက်နေ့တွင် ပယ်ချခံခဲံရသည်။ ထို့နောက် နိုင်ငံတော် သမ္မတထံ ဆက်လက်အယူခံဝင်ရာ ခင်မောင်ရင်၊ သုခ နှင့် မောင်နီတို့ အပေါ်ချမှတ်ထားသော သေဒဏ်ကို ပယ်ဖျက်ကာ၊ တစ်သက်တစ်ကျွန်းပြစ်ဒဏ်သို့ ပြောင်းလဲပေးခဲ့သည်။ ဦးစော၊ သက်နှင်း၊ မောင်စိုး၊ မှုန်ကြီးတို့အား အင်းစိန်ထောင်တွင်လည်းကောင်း၊ စိန်ကြီးနှင့် ရန်ကြီးအောင်တို့အား ရန်ကုန် အကျဉ်းထောင်တွင်လည်းကောင်း ၁၉၄၈၊ မေလ ၈ ရက်နေ့တွင် ကြိုးပေးစီရင်ခဲ့ကြသည်။

လုပ်ကြံခံရသူများ

၁။ ဦးအောင်ဆန်း (ဝန်ကြီးချုပ်)

၂။ ဦးဘချို (ပြန်ကြားရေးဝန်ကြီး)

၃။ မန်းဘခိုင် (အလုပ်သမားရေးရာဝန်ကြီး)

၄။ ဦးဘဝင်း (စီးပွားရေးနှင့်ထောက်ပံ့ရေးဝန်ကြီး)

၅။ သခင်မြ (ပြည်ထဲရေးဝန်ကြီး)

၆။ ဦးအဗ္ဗဒူရာဇတ် (ပညာရေးနှင့် အမျိုးသားစီမံကိန်းဝန်ကြီး)

၇။ စဝ်စံထွန်း (နယ်ခြားဒေသဆိုင်ရာဝန်ကြီး)

၈။ ဦးအုန်းမောင် (သယ်ယူပို့ဆောင်ရေးဝန်ကြီး)

၉။ ရဲဘော်ကိုထွေး ( ဦးအဗ္ဗဒူရာဇတ် (ပညာရေးနှင့် အမျိုးသားစီမံကိန်းဝန်ကြီး)၏ သက်တော်စောင့်တို့ ဖြစ်ကြသည်။

ဘဏ္ဍာရေးဝန်ကြီးဖြစ်သူ ဦးတင်ထွဋ်သည် ဒဏ်ရာအပြင်းအထန်ရရှိခဲ့သော်လည်း အသက်ရှင်ကျန်ရစ်ခဲ့သည်။

လုပ်ကြံသူများဖမ်းဆီးခံရခြင်း

လုပ်ကြံခံရသည့် ညနေတွင် တရားခံများအား သောင်းကျန်းမှုနှိမ်နင်းရေးတပ် တပ်ရင်းအမှတ် (၁) မှ တပ်ခွဲမှုး ဗိုလ်သိန်းဟန်နှင့် ရဲဘော်များသည် မရမ်းကုန်းမြို့နယ် အေဒီလမ်း (ယခုမေခလမ်း) အမှတ် ၄ ရှိ ဦးစော အိမ်သို့ဝိုင်းပြီး အိမ်တွင်းအိမ်ပြင် ရှာဖွေဖမ်းဆီးကာ စုံထောက် အင်စပက်တာ မစ္စတာဂျပ်ခေါင်းဆောင်သော ပုလိပ်အဖွဲ့သို့ အပ်နှံခဲ့သည်။ ထို့ပြင်ဗြိတိသျှဝန်ထမ်းနှစ်ဦး ဖမ်းဆီးစစ်ဆေးခံရပြီး တစ်ဦးသည် စစ်သုံးကိရိယာများ ထောက်ပံပေးမှုဖြင့် တရားစွဲဆိုခံရသည်။

ပစ်ခတ်ခဲ့သူများ

၁။ ရန်ကြီးအောင် (ရဲဘော်ကိုထွေးနှင့် အစည်းအဝေးခန်းမတွင်းဝင်ရောက်ပစ်ခတ်သူ)

၂။ သက်နှင်း (ဦးဆောင်ပစ်ခတ်သူ)

၃။ မောင်စိုး (ဦဆောင်ပစ်ခတ်သူ)

၄။ စိန်ကြီး (ဦးဆောင်ပစ်ခတ်သူ)

၅။ သုခ (ကားမောင်းသူ)

ပထမဆုံးအာဇာနည်နေ့အခမ်းအနား

၁၉၄၇၊ ဇူလိုင် လ ၂၀ ရက်နေ့တွင် ဆူးလေဘုရားအနီးရှိ ဖိုက်ချ်စကွဲယား (ယခု မဟာဗန္ဓုလပန်းခြံတွင်) နိုင်ငံတောင်ဈာပန ဗဟိုကော်မတီဝင် ဗမာနိုင်ငံလုံးဆိုင်ရာ ကျောင်းသားများသမဂ္ဂဥက္ကဋ္ဌ၊ ရန်ကုန်ခရိုင်ကျောင်းသားများသမဂ္ဂ ဥက္ကဋ္ဌ၊ တက္ကသိုလ်ကျောင်းသားများသမဂ္ဂဒုတိယဥက္ကဋ္ဌ၊ မြို့မကျောင်းသားများ သမဂ္ဂဥက္ကဋ္ဌ တို့သည် ကျောင်းသားပြည်သူ တစ်သိန်းကျော်တက်ရောက်သော လူသတ်ဝါဒရှုတ်ချပွဲကို ဦးဆောင်ကျင်းပခဲ့ပြီး ထိုအခမ်းအနားသည်ပထမဆုံး အာဇာနည်နေ့ အခမ်းအနားဖြစ်သည်။

အာဇာနည်ကိုးဦးလုပ်ကြံခံရပြီးမကြာမီတွင် ဘုရင်ခံချုပ် ဆာဟူးဘတ်ရန့်သည် ၁၉၄၈၊ ဇန်နဝါရီလ ၄ ရက်နေ့တွင် လွတ်လပ်ရေးပေးအပ်ခဲ့ပြီး ဦးနုသည် ပထမဆုံးဝန်ကြီးချုပ်ဖြစ်လာသည်။ ထိုအချိန်မှ စ၍နှစ်စဉ်နှစ်တိုင်း အာဇာနည်နေ့အခမ်းအနားကို ဇူလိုင်လ ၁၉ ရက်နေ့တွင်ကျင်းပခဲ့ကြသည်။

ကိုးကား- မြန်မာ့စွယ်စုံကျမ်းအတွဲ ၁၄ (အာဇာနည်နေ့)

#credit crdphoto

#ဝဖြိုးဆုသင်ထေ